Një dokument arkivor i zbuluar nga Autoriteti për Informimin mbi Dokumentet e Ish-Sigurimit të Shtetit (AIDSSH) konfirmon se Qemal Draçini, një intelektual dhe mësues i ri, u torturua për vdekje në qelitë e Sigurimit të Shtetit në vitin 1947.
Dokumenti, i firmosur nga një ish-oficer i Sigurimit në Shkodër, pranon hapur se Draçini dhe disa të tjerë u ndëshkuan me metoda çnjerëzore, ndonëse ndaj tyre nuk kishte asnjë provë konkrete për veprimtari armiqësore.
Në dosjen gjyqësore nr. 1623/6, zbulohet një listë me emra të të rinjve të ekzekutuar ose të vdekur nga torturat, përfshirë: - Qemal Draçini - Osman Kazazi AT Bernandin Palaj - Nuh Oroshi - Kel Shan Dede - Myrteza Pipa - Liman Kraja
Në një pasazh tronditës, oficeri i Sigurimit shkruan:
"Shumë të arrestuar nuk kishin fare dosje apo materiale, por si mund të flasë një armik pa patur diçka komprometuese? Atëherë rrihej derisa të pranonte gjëra të pabëra… Askush nga oficerët e Sigurimit nuk u dënua ndonjëherë për këto raste.”*
Një histori ende pa drejtësi
Qemal Draçini, i lindur më 6 mars 1922 në Shkodër, kishte studiuar për drejtësi në Firence dhe më pas punonte si mësues letërsie dhe hartues tekstesh shkollore. Pikëpamjet e tij kritike ndaj regjimit komunist u bënë shkak për arrestimin dhe ekzekutimin e tij të heshtur.
Pavarësisht dokumenteve të qarta, ende sot nuk dihet vendndodhja e eshtrave të tij.
Autoriteti i Dosjeve të Ish-Sigurimit
