Një ngjarje e rëndë është regjistruar paraditen e sotme në qytetin e Vlorës, ku një vajzë 17-vjeçare ka mbërritur në spital me plagë të shkaktuara nga armë zjarri.
E mitura është transportuar me urgjencë nga familjarët në Spitalin Rajonal të Vlorës, ku sipas mjekëve, ka qenë në gjendje të vetëdijshme në momentin e paraqitjes. Burime nga spitali bëjnë me dije se ndodhet nën kujdesin e mjekëve, ndërsa gjendja e saj shëndetësore është e rëndë.
Sipas njoftimit zyrtar të Policisë së Vlorës, ngjarja ka ndodhur rreth orës 11:40, në banesën e vajzës në lagjen "Kushtrimi", ku dyshohet se ajo është vetëplagosur me një armë zjarri të tipit pistoletë.
“Grupi hetimor ndodhet në vendngjarje dhe po punon intensivisht për zbardhjen e plotë të rrethanave të kësaj ngjarjeje”, thuhet në deklaratën e policisë.
Ndërkohë, pritet që hetimet të hedhin më shumë dritë mbi motivet dhe mënyrën se si është siguruar arma që shkaktoi plagosjen e të miturës.
