Minutë heshtjeje për tmerrin që nuk mund të përshkruhet me fjalë - sulmi më i rëndë amok me armë zjarri në historinë austriake. Tre ditë Austria është në zi.
Dhjetë persona u vranë kur një ish-nxënës hapi zjarr në një shkollë të mesme në Graz, autori i krimit kreu vetëvrasje. Det qirinjsh ndriçon sheshin kryesor të Gracit. Qindra vetë u mblodhën, duke sjellë qirinj, shumë prej tyre me lot në sy.
Shumë e njohin mirë gjimnazin, "Oberstufenrealgymnasium", që u kthye në një vend vdekjeprurës pak para pushimeve verore kur një ish-nxënës u fut aty, duke qëlluar dhe vrarë qëllimisht nxënës e mësues. "Ky tmerr nuk mund të përshkruhet me fjalë", tha Presidenti Federal i Austrisë, Alexander Van der Bellen.
21 vjeçari që kreu sulmin amok, një ish-nxënës pa asnjë regjistrim në polici, ishte i papunë dhe nuk e kishte mbaruar shkollën. Thuhet se është ndjerë viktimë e bulizmit. Pyetjet më urgjente që ngrihen nga mjaft austriakë tani: si mundet që ky djalë të mund të merrte lejen për armë, kur Austria ka ligje kaq të rrepta për armët.
