Stavro Skendi konsiderohet ende si një ndër hulumtuesit më të famshëm të studimeve shqiptare. I lindur në Korçë dhe i arsimuar në shkollën elitare amerikane, “Robert College” në Stamboll, pasi kthehet në Shqipëri kontribuon në arsimin shqiptar, duke qenë profesor në Berat. Skendi, si patriot dhe simpatizant i Ballit Kombëtar, nuk mbështeti pushtimin fashist të Shqipërisë më 1939. Gjatë Luftës së Dytë Botërore, ai bashkëpunoi me shërbimin agjenturor amerikan OSS – Office of Strategic Services. Pak e dinë që regjimi fashist e internoi në Itali gjatë luftës, bashkë me shumë patriotë të tjerë të Ballit dhe të Legalitetit.
Pas luftës, Stavro Skendi u doktorua në Columbia University dhe dha mësim si profesor i historisë, gjuhëve dhe kulturave në studimet ballkanike në Universitetin e Princeton. Po në Universitetin e Princeton, drejtoi edhe Qendrën e Studimeve Ballkanike, derisa doli në pension.
Gjatë viteve në SHBA, ai ishte një ndër njohësit dhe ekspertët më të mirë të administratës amerikane për Ballkanin dhe Shqipërinë. Në kuadër të Luftës së Ftohtë, Stavro Skendi bashkëpunoi ngushtësisht edhe me CIA-n si ekspert i shkëlqyer i gjeopolitikës ballkanike.
Ndër botimet e tij me vlerë janë: *Albanian and South Slavic Oral Epic Poetry* (1954), *Albania* (1958), *The Emergence of the Modern Balkan Literary Languages: A Comparative Approach* (1964), *Crypto-Christianity in the Balkan Area under the Ottomans* (1967), *The Albanian National Awakening, 1878-1912* (1967), dhe *Balkan Cultural Studies* (1980).
