Klodian Rasha, 25 vjeç, u qëllua për vdekje me plumb pas shpine nga një oficer policie në orët e para të mëngjesit të 8 dhjetorit 2020. Krimi tronditës, që përgjak ditën e Rinisë, ndodhi në rrugën "Dritan Hoxha" në Tiranë, pasi një patrullë policie i bëri thirrje Rashës të ndalonte, me argumentin se kishte shkelur kufizimet e pandemisë së COVID-19, që ndalonin lëvizjet pas orës 22:00.
Për vrasjen e Klodian Rashës është dënuar me 18 vite burg oficeri i policisë Nevaldo Hajdaraj, por për shkak të gjykimit të shkurtuar, ai do të vuajë vetëm 12 vite burgim. Aktualisht, dosja e çështjes pret shqyrtim nga Gjykata e Lartë.
Sot mbushen 4 vite nga vrasja e një të riu, ëndrrat e të cilit u ndërprenë brutalisht në lulen e rinisë, pa bërë asnjë faj. Megjithatë, drejtësia ende nuk ka arritur të zbulojë dhe ndëshkojë ata që tentuan të manipulojnë këtë ngjarje të rëndë.
Pyetjet që mbeten pa përgjigje
Kush e hodhi pistoletën pranë vendit ku u qëllua Klodian Rasha? Ky veprim, i kryer për të fshehur të vërtetën dhe për të krijuar idenë se viktima ishte i armatosur, ishte një përpjekje për ta bërë atë të dukej fajtor. E vërteta, megjithatë, është se Klodian Rasha nuk kishte armë me vete, dhe ky fakt tronditës dëshmon për një tentativë të hapur të Policisë së Shtetit për të manipuluar krimin.
Përgjegjësit në liri, e vërteta e paqartë
Sot, pas 4 vitesh, askush nga ata që orkestruan dhe kryen manipulimin nuk është përballur me drejtësinë. Ndërkohë që ata janë të lirë, Klodian Rasha nuk jeton më.
Në këtë ditë simbolike për të rinjtë, autoritetet kanë detyrimin moral dhe ligjor të reflektojnë dhe të nxjerrin në dritë të vërtetën mbi vrasjen e Klodian Rashës dhe përpjekjet për ta fshehur atë. Drejtësia për Klodianin është ende një borxh i papaguar.
