Sot, Instituti i Sigurisë Ushqimore dhe Veterinare ka publikuar rezultatin e analizave të vezëvë të konsumuara nga fëmijët e kopshtit publik në Gramsh.
Sipas të dhënave rezulton se janë marrë 5 mostra për t'u analizuar dhe të gjitha janë të kontaminuara me bakterin Salmonela spp. Ky skandal thellohet akoma më tej duke parë analizat e ISUV, ku për të 5 mostrat e marra fshihet emri i kompanisë që shet.
Ky shqetësim është ngritur edhe nga Presidenti i Urdhrit Veterinar, Ervin Resuli, i cili ka reaguar pas publikimit të analizave laboratorike që zbuluan praninë e bakterit Salmonella spp. në vezë të marra nga tregjet në rajonin e Elbasanit.
Në një deklaratë publike, Resuli thekson se analizat e kryera nga Instituti i Sigurisë Ushqimore dhe Veterinare (ISUV) më 29 maj mbi pesë kampione vezësh të marra zyrtarisht nga Autoriteti Kombëtar i Ushqimit (AKU) kanë rezultuar të gjitha pozitive për salmonelë, sipas standardit ndërkombëtar ISO 6579-1:2017. “Situata është alarmante dhe përbën një kërcënim të drejtpërdrejtë për shëndetin publik, veçanërisht nëse produkti konsumohet pa përpunim termik,” paralajmëron Resuli. Ai shton se prania e Salmonella spp. në vezë mund të shkaktojë sëmundje të rënda gastrointestinale, veçanërisht tek grupet më të ndjeshme të popullsisë si fëmijët, të moshuarit, gratë shtatzëna dhe personat me imunitet të dobët. Përballë kësaj situate, Presidenti i Urdhrit Veterinar kërkon marrjen e masave urgjente, duke përfshirë: Ndalimin e menjëhershëm të tregtimit të produktit të kontaminuar; Gjurmimin dhe izolimin e lotëve të vezëve të ndotura; Kontroll të plotë sanitar-veterinar në subjektet prodhuese dhe shpërndarëse; Njoftimin e konsumatorëve dhe asgjësimin e vezëve, sipas procedurave ligjore. “Përgjegjësia bie mbi AKU, si institucioni që ka për detyrë të garantojë sigurinë ushqimore dhe të mbrojë shëndetin e konsumatorëve,” thekson Resuli në fund të reagimit të tij.
