Studiuesi dhe ish-drejtuesi i institucionit për menaxhimin e trashëgimisë kulturore, Auron Tare, ka ngritur alarmin publik lidhur me ndërtimin e një resorti turistik në Parkun Kombëtar të Butrintit, një prej zonave më të mbrojtura në Shqipëri dhe të shpallura Pasuri Botërore nga UNESCO.
Denoncimi vjen pas një postimi të bërë nga kompania kosovare “Enea Resort”, e cila ka njoftuar nisjen e punimeve për një hotel në majën e malit Mile, pjesë e parkut natyror të Butrintit.
Tare ka kërkuar transparencë të menjëhershme nga institucionet përgjegjëse, duke theksuar rëndësinë e ruajtjes së një zone të mbrojtur që gëzon vlera të jashtëzakonshme natyrore dhe kulturore.
Deri më tani nuk ka asnjë deklaratë zyrtare nga autoritetet shtetërore lidhur me këtë projekt, ndërsa vetë Kryetari i Bashkisë Konispol, në një reagim për mediat, ka pohuar se bashkia nuk është në dijeni për asnjë leje ndërtimi të dhënë në këtë zonë.
Ky zhvillim ka ngjallur shqetësim të madh në opinionin publik dhe komunitetin e ekspertëve të trashëgimisë kulturore, të cilët kërkojnë që ndërtimet në territore të mbrojtura të trajtohen me rigorozitet dhe në përputhje të plotë me ligjin dhe konventat ndërkombëtare për mbrojtjen e trashëgimisë botërore.
