Kombëtarja shqiptare ka humbur një vend në renditjen e FIFA pas ndeshjeve të marsit, duke u pozicionuar në vendin e 66-të. Kuqezinjtë u mundën 2-0 nga Anglia në “Uembli” dhe fituan 3-0 ndaj Andorrës në “Arenën Kombëtare”, por këto rezultate nuk e ndihmuan ekipin të mbante pozicionin e mëparshëm.
Nga ana tjetër, Kosova ka shënuar progres historik, duke u ngjitur në vendin e 97-të pas dy fitoreve ndaj Islandës në play-off-in e Ligës së Kombeve. Ky sukses i siguron “Dardanëve” një vend në Ligën B për edicionin e ardhshëm.
Në krye të klasifikimit qëndron sërish Argjentina, e ndjekur nga Spanja dhe Franca. Nga rivalët e Shqipërisë në eliminatore, Anglia mban vendin e katërt, ndërsa Serbia është ngjitur në vendin e 31-të. Letonia dhe Andorra renditen shumë më poshtë.
