Ministria e Brendshme ka shpallur “non grata” edhe dy shtetas shqiptarë nga Maqedonia e Veriut, të cilët dyshohen se kanë zhvilluar veprimtari armiqësore ndaj shtetit shqiptar. Mësohet se vendimi është marrë pas propozimit të Drejtorisë së Antiterrorit, e cila i ka konsideruar ata si kërcënim për sigurinë kombëtare.
Në listën e personave të padëshiruar janë përfshirë imami Bekir Halimi dhe politikani e analisti Valon (Valjon) Belja. Bekir Halimi u përjashtua në vitin 2016 nga Bashkësia Fetare Islame e Maqedonisë së Veriut pas përplasjeve me drejtuesit e institucionit. Ndërkohë, Valon Belja është i njohur për komentet e tij mbi zhvillimet politike në rajon dhe më parë ka mbajtur detyrën e shefit të kabinetit të Ministrit të Shëndetësisë në Maqedoninë e Veriut.
Sipas informacioneve të siguruara nga strukturat e Antiterrorit, të dy personat përbëjnë një kërcënim real për sigurinë e vendit dhe qytetarëve shqiptarë.
Më herët, më 25 qershor, Ministria e Brendshme shpalli “non grata” edhe shtetasen nga Kosova, Ikballe Huduti, duke i ndaluar hyrjen në territorin shqiptar për një periudhë 15-vjeçare. Sipas autoriteteve, Huduti ka lidhje të ngushta me regjimin iranian dhe ka bërë thirrje publike kundër rendit kushtetues në Shqipëri. Përpara marrjes së këtij vendimi, ajo kishte publikuar në rrjetet sociale foto dhe video nga pjesëmarrja në protestën e zhvilluar para Kryeministrisë në Tiranë.
