Sipas mediave britanike, Shërbimi Sekret i Inteligjencës së Mbretërisë së Bashkuar (MI6) ka paralajmëruar se propozimet e liderit të Partisë Laburiste, Sir Keir Starmer, për deportimin e emigrantëve në qendra kthimi në Ballkan nuk janë të sigurta nga këndvështrimi i sigurisë kombëtare.
Sipas një burimi qeveritar, MI6 vlerëson se rajoni i Ballkanit, për shkak të afërsisë së tij me Rusinë, nuk është vend i përshtatshëm për dërgimin e personave që nuk kanë fituar azil në Britani. Shërbimi sekret paralajmëron se kjo do të nënkuptonte “dërgimin e njerëzve në një zonë të ndikimit rus”.
Burimi shtoi se zyrtarët e sigurisë kanë shprehur shqetësim se infrastruktura dhe institucionet britanike që do të krijohen në këto qendra mund të jenë objektiv i agjentëve rusë. “Do të ishte si të vendosje një pjesë të rëndësishme të interesave britanike në një rajon ku Rusia ka ndikim të madh,” tha ai.
Gjithashtu, zyrtarët paralajmëruan se emigrantët që do të dërgohen atje mund të jenë të ekspozuar ndaj shfrytëzimit nga regjimi i presidentit Vladimir Putin.
Sir Keir Starmer konfirmoi këtë muaj se qeveria po diskuton me disa vende për krijimin e këtyre qendrave të kthimit jashtë Britanisë, duke i përshkruar ato si “një inovacion shumë të rëndësishëm”.
Në listën e vendeve të mundshme përfshihen Serbia, Kosova, Maqedonia e Veriut dhe Bosnja-Hercegovina. Personat që refuzohen për azil do të dërgohen në këto qendra pasi të kenë shfrytëzuar të gjitha rrugët e ankimit në Mbretërinë e Bashkuar.
MI6 kishte ngritur shqetësime edhe për një plan të mëparshëm të qeverisë konservatore në vitin 2022, i cili përfshinte Shqipërinë dhe Moldavinë si vende të mundshme për qendrat e emigrantëve në Ballkan. Të njëjtat shqetësime janë shfaqur edhe për planet aktuale.
Burimet e sigurisë shprehen se nga perspektiva e sigurisë, kjo nuk është një ide e mirë. Rusia ka treguar gatishmërinë për të përdorur migracionin si mjet për influencë dhe manipulim.
“Vendosja e një qendre të madhe për përpunimin e kërkesave të azilit pranë një shteti armiqësor është shumë e rrezikshme,” tha një burim.
Një tjetër burim shtoi se shqetësimet ndryshojnë nga vendi në vend, por Serbia konsiderohet si më problematike për shkak të lidhjeve të forta me Moskën dhe ndikimit të madh rus në rajon. Rusia përdor mënyra të ndryshme për të ushtruar ndikim – përmes korrupsionit, prezencës së agjentëve, bandave të organizuara dhe instalimit të figurave pro-ruse në qeveri.
Presidenti serb Aleksandar Vuçiq ka vizituar disa herë Moskën gjatë vitit të fundit dhe është një aleat i ngushtë i Putinit. Po ashtu, mbajtësit e pasaportave ruse mund të lëvizin lirshëm në Serbi, duke krijuar mundësi për ndikime të mëtejshme.
Bisedimet joformale mes Britanisë dhe disa vendeve të Ballkanit kanë nisur këtë javë për të eksploruar mundësinë e krijimit të këtyre qendrave. Presidenti i Kosovës ka shprehur gatishmërinë për një marrëveshje, por ekspertët paralajmërojnë se ekzistojnë sfida ligjore, pasi disa vende evropiane nuk e njohin pavarësinë e Kosovës dhe ajo nuk është anëtare e Konventës Evropiane për të Drejtat e Njeriut.
Qeveria britanike pritet të bëjë të ditura vendet që do të pranojnë këto qendra para samitit të liderëve të Ballkanit Perëndimor në Londër, këtë vjeshtë, ku migracioni i paligjshëm do të jetë temë kryesore.
Departamenti i Punëve të Jashtme të Britanisë ka refuzuar të komentojë më tej mbi këto plane.
