Hamasi ka bërë të ditur se po zhvillon një “rishikim të plotë” të propozimit të fundit amerikan për një armëpushim në Rripin e Gazës, por e konsideron planin si të pamjaftueshëm, duke theksuar se nuk përmbush kërkesat e tij kryesore.
Në të njëjtën kohë, Shtëpia e Bardhë ka deklaruar se Izraeli ka pranuar marrëveshjen, e cila parashikon një armëpushim 60-ditor dhe shkëmbimin e pengjeve izraelite me të burgosur palestinezë. Megjithatë, vetë autoritetet izraelite nuk kanë bërë ende një deklaratë zyrtare për këtë propozim.
Kujtojmë se armëpushimi i fundit dypalësh u ndërpre në muajin mars, kur Izraeli vendosi një bllokadë të plotë në Gaza dhe rifilloi ofensivën e tij ushtarake. Sipas Ministrisë së Shëndetësisë të kontrolluar nga Hamasi, që prej atëherë janë vrarë afro 4,000 persona.
Ndërkohë, situata humanitare në Gaza po përkeqësohet me ritme alarmante. Zyra e OKB-së për Koordinimin e Çështjeve Humanitare (OCHA) paralajmëron se Gaza është “vendi më i uritur në Tokë”, duke shtuar se 100% e popullsisë është në rrezik nga uria.
Izraeli vijon të deklarojë se veprimet ushtarake kanë për qëllim shkatërrimin e Hamasit dhe kthimin e pengjeve të mbajtura në Rripin e Gazës. Ndërkohë, komuniteti ndërkombëtar po i bën thirrje të dyja palëve për të arritur një marrëveshje të qëndrueshme që mund të sjellë një ndalesë të vërtetë të luftimeve dhe të lehtësojë krizën humanitare
