E ngarkuara me punë e Shteteve të Bashkuara në Tiranë deklaroi se kompanitë amerikane po i kushtojnë gjithnjë e më shumë vëmendje Shqipërisë, ndërsa theksoi se një numër investitorësh amerikanë tashmë operojnë në vend dhe të tjerë po shqyrtojnë mundësinë për të hyrë në tregun shqiptar.
Gjatë një aktiviteti të organizuar nga Dhoma Amerikane e Tregtisë, diplomatja amerikane vlerësoi kuadrin e ri për shqyrtimin e investimeve të huaja direkte, duke e cilësuar atë si një hap strategjik për të garantuar që Shqipëria të mbetet e hapur ndaj biznesit, por njëkohësisht të mbrojë interesat e saj kombëtare.
“Kompanitë amerikane janë këtu – në energji, ndërtim dhe teknologji – dhe shumë të tjera po shikojnë të vijnë. Por investitorët kanë nevojë për besim se rregullat janë të qarta, se fusha e lojës është e barabartë dhe se sektorët strategjikë janë të mbrojtur nga aktorë që nuk luajnë sipas të njëjtave rregulla si ne”, deklaroi ajo.
Sipas diplomates amerikane, mekanizmi i shqyrtimit të investimeve nuk duhet parë si një procedurë burokratike, por si një instrument që garanton sigurinë ekonomike dhe tërheqjen e investimeve afatgjata. Ajo kujtoi se edhe politika amerikane e investimeve bazohet në parimin e mirëpritjes së kapitalit që nxit rritjen ekonomike, duke mbrojtur njëkohësisht infrastrukturën kritike dhe sektorët strategjikë.
E ngarkuara me punë theksoi se miratimi i ligjit është vetëm hapi i parë dhe se suksesi do të varet nga mënyra se si ai do të zbatohet në praktikë. Sipas saj, Shtetet e Bashkuara do të vazhdojnë të mbështesin Shqipërinë në këtë proces, duke punuar me institucionet përgjegjëse për ta bërë funksional kuadrin e ri të investimeve.
Mesazhi i saj ishte i qartë: Shqipëria mund të tërheqë më shumë investime amerikane dhe ndërkombëtare vetëm nëse garanton transparencë, siguri juridike dhe rregulla të barabarta për të gjithë aktorët në treg.
