Protesta qytetare kundër qeverisë vijoi edhe në ditën e saj të 15-të, duke sjellë këtë herë një ftesë publike për deputeten Marjana Koçeku, e cila së fundmi është vetëdeklaruar deputete e pavarur. Ashtu si në mbrëmjet e mëparshme, protestuesit u mblodhën fillimisht në Sheshin Skënderbej dhe më pas marshuan drejt sheshit përpara Kryeministrisë.
Në foltoren e protestës u ngjitën dhjetëra qytetarë, shumica prej tyre të ardhur nga diaspora, të cilët përsëritën mesazhet dhe kërkesat që kanë shoqëruar tubimet e ditëve të fundit. “Rama në burg”, “Berisha në burg” dhe “Shqipëria e re” ishin sloganet që u dëgjuan për një kohë të gjatë nga pjesëmarrësit.
Megjithatë, jo të gjithë e pritën me entuziazëm afrimin e Marjana Koçekut me protestën. Një ish-student, gjatë fjalës së tij, tha se kishte protestuar krah saj vite më parë në protestën studentore, por sipas tij ajo më pas kishte tradhtuar idealet e asaj lëvizjeje duke u vënë në shërbim të Edi Ramës.
Ndërkohë, një nga zërat më aktivë të protestës, Arben Kola, në përfundim të fjalës së tij i bëri thirrje SPAK-ut të përshpejtojë hetimet për çështjet që kanë ngritur protestuesit. Ai paralajmëroi se, në të kundërt, protestat paqësore mund të zhvendosen edhe përpara godinës së SPAK-ut.
Protesta u mbyll përpara Kryeministrisë, ndërsa më pas pjesëmarrësit vijuan marshimin në disa prej rrugëve të Tiranës.
