Protesta në ditën e saj të 14-të vijoi me ritualin e zakonshëm të grumbullimit në Sheshin “Skënderbej” dhe më pas para Kryeministrisë. Folësit përsëritën edhe njëherë mesazhin e tyre kundër klasës politike me thirrjet “Rama në burg, Berisha në burg, Shqipëria e re”, ndërsa në foltore u ngjitën edhe aktivistë nga diaspora.
Kërkesat mbetën të pandryshuara, me theks te dorëheqja e kryeministrit Edi Rama, ndërkohë që ende nuk është bërë publike një listë e organizatorëve të protestës. Aktivistë të ndryshëm, të cilët prej dy javësh mblidhen çdo mbrëmje në Bulevardin “Dëshmorët e Kombit”, kënduan edhe këngën që është kthyer në simbol të protestës, “Rama jep dorëheqjen”.
Gjatë tubimit pati edhe thirrje drejtuar SPAK-ut dhe institucioneve të drejtësisë për të vijuar punën e tyre. Një nga kërkesat e artikuluara qartë nga aktivisti Arben Kola ishte që Altin Dumani të marrë një mandat të dytë në krye të SPAK-ut.
Protesta u mbyll para Kryeministrisë për t’u zhvendosur më pas në rrugët e Tiranës. Edhe sot, si në ditët e mëparshme, nuk u regjistrua asnjë incident.
