Të jesh deputet në Shkodër dhe të vendosësh të dalësh nga grupi i Partisë Socialiste, nuk është thjesht një vendim politik, por një test i mirëfilltë i moralit dhe traditës sipas Kryebashkiakut të Lezhës, Pjerin Ndreu.
Pasi deputetja Marjana Koçeku zgjodhi të largohej nga grupi i PS-së, duke u pozicionuar në krah të protestave të qytetarëve, Ndreu nuk ka qëndruar indiferent dhe ka vendosur t'i kujtojë "mikes" së tij një parim të vjetër të përshtatur për kohët moderne, duke shkruar se aty ku ha bukë, nuk përmbys kupën.
Sipas tij, të ndryshosh mendim apo ide është plotësisht normale dhe njerëzore, por të mbash mandatin pasi nuk përputhesh më me partinë që të vuri në krye të listës, këtu ndryshon puna. Morali i malësorit, sipas kësaj logjike, kërkon që "fisnikëria" e vërtetë të tregohet duke dorëzuar karrigen e deputetit e duke u kthyer në shtëpi.
Edhe pse Ndreu na siguron me sportivitet se ky largim nuk përbën ndonjë dramë për Partinë Socialiste, ai sërish gjen kohën të bëjë rojtarin e moralit politik për qarkun fqinj, duke na treguar se në botën e sotme, përfaqësimi i njerëzve në protestë mund të konsiderohet fare thjesht si një shkelje besimi ndaj partisë.
