Deputetja e Partisë Socialiste, Sara Mila, dhe aktivistja Sidorela Vatnikaj janë përplasur në një debat të fortë për financimin e koncertit të Kanye West me 4.2 milionë euro.
Vatnikaj tha se fondet e përdorura për koncertin duhej të ishin shkuar për sistemin shëndetësor, duke iu referuar edhe kërkesës së fundit të QSUT për donacione për pajisje mjekësore.
Pjesë nga debati:
Sidorela Vatnikaj: Ne vijmë për të diskutuar ide, kur kemi përballë përfaqësues të qeverisë përfundojmë duke dekonstruktuar të pavërteta. Është e pavërtetë që protesta është bërë për “rahmet”, pasi është në ditën e 44. Është e pavërtetë të thuash që ishte Kanye West që vendosi Shqipërinë në mediat ndërkombëtare, pasi ka 44 ditë që flet e gjithë media botërore për korrupsionin e Edi Ramës, krimin e organizuar që ka futur në Shqipëri dhe median e kapur që mbështet Ramën.
Sara Mila: Po bëjmë garë tani? Nuk janë shqiptarë ata që kanë shkuar në koncert?
Sidorela Vatnikaj: Janë nga shkollat 9-vjeçare, të gjithë patronazhistët, sistemin e mësuesve.
Sara Mila: Të anatemosh një koncert të lirë… Të anatemohen njerëzit sepse shkojnë në koncert, është e tmerrshme. Ka njerëz që shkojnë edhe në protestë, edhe në koncert.
Sidorela Vatnikaj: Fakti që bërtet nuk do të thotë se ke të drejtë. Është ofenduese, përveçse vjedhje ndaj qytetarëve, që 4.2 milionë euro që iu dhuruan Kanye West nuk i shkojnë QSUT-së, që sot nxjerr shpallje se nuk ka shtretër dhe kompjuterë.
Sara Mila: Këta duan që të rinjtë me dhunë të rrinë në protestë.
Sidorela Vatnikaj: Pse nuk ia dhatë QSUT-së 4 milionë euro?
Sara Mila: Ç’ke moj ti, se do t’i japim edhe QSUT. Një vend ka edhe spitalin, edhe argëtimin, edhe qejfin.
Sidorela Vatnikaj: Më shumë duhet Kanye West sesa ilaçet në QSUT?
