Kreu i Partisë Mundësia, Agron Shehaj, ka reaguar ndaj debatit të krijuar mbi deklaratën e tij të pasurisë, ku rezulton se në shtator të vitit të kaluar ka shitur një pasuri të paluajtshme për 15 milionë euro. Në vend të një sqarimi teknik mbi vlerësimin e pronës, Shehaj publikoi një fotografi të vilës së tij të pushimeve në Itali, duke konfirmuar se bëhet fjalë pikërisht për atë pasuri.
“Po, kjo është vila ime e plazhit në Itali. Nuk është zbulim i Taos dhe as i mediave të tyre, por është deklarimi që vetë unë kam bërë. Pasuria ime e vënë me punë të ndershme. Jam krenar për çfarë kam arritur sepse partnerët e mi kanë qenë gjigandët si ‘Vodafone’ e ‘Google’. Kam punësuar mijëra të rinj, kam paguar taksa. Askush s’më ka falur asgjë dhe nuk kam asgjë për të fshehur,” shkruan Shehaj.
Reagimi vjen pasi nga deklarata e pasurisë rezulton se ai ka shitur një pasuri të përshkruar si truall dhe ndërtesë me sipërfaqe totale 251 m² për 15 milionë euro. Vlera e deklaruar ka ngritur pikëpyetje, ndërsa në të njëjtin dokument Shehaj deklaron blerjen e pronave të tjera në Itali me sipërfaqe shumë më të mëdha dhe me çmime dukshëm më të ulëta. Në fund të reagimit, ai sulmoi edhe kundërshtarët politikë, duke thënë se, ndryshe prej tyre, pasurinë e ka krijuar me biznes dhe punë të ndershme.
