Deputetja e pavarur Marjana Koçeku ka zbuluar mesazhin që, sipas saj, i ka dërguar kryeministri Edi Rama pasi vendosi të largohej nga Partia Socialiste dhe të vijonte mandatin si deputete e pavarur.
Në një intervistë për gazetën holandeze De Volkskrant, Koçeku, e njohur edhe si “Nemalësorja”, tha se Rama i kishte shkruar se do të përfundonte e vetme, pa mbështetjen e qytetarëve dhe të përkrahësve të saj në zonën e Malësisë.
“Nuk dua të them shumë për këtë, por ai më dërgoi një mesazh se do të përfundoj vetëm, pa besimin e popullsisë apo të mbështetësve të mi në male. Përgjigja ime ndaj tij ishte e thjeshtë: Jam mësuar të qëndroj vetëm. E vetmja gjë që ka vërtet rëndësi për mua tani është se e kam mbyllur derën pas meje dhe jam e lirë. Për fat të mirë, nëna ime nuk ka rrjete sociale, kështu që nuk sheh asnjë nga agresionet dhe ngjyrimet politike që janë përhapur rreth meje që nga largimi im”, u shpreh ajo.
Duke shpjeguar arsyet e largimit nga Partia Socialiste, Koçeku tha se zëri i saj kritik nuk u dëgjua dhe se shqetësimet që ngrinte për çështjet mjedisore u anashkaluan.
Sipas saj, momenti vendimtar ishte kur dolën në dritë debatet lidhur me projektin e resortit të Jared Kushnerit në Zvërnec, çka e bëri të kuptonte se po mbështeste politika që, sipas saj, dëmtojnë mjedisin.
“Më anashkaluan plotësisht temat që më prekin shumë, siç është ndotja e lumit Drin, nga vij unë. Kur dolën në dritë skandalet e mëdha mjedisore që rrethonin resortin e Kushnerit, kuptova se duhej të mbështesja politika që në fakt shkatërrojnë mjedisin. Ky ishte kufiri im moral”, deklaroi deputetja.
Koçeku u shpreh gjithashtu se pret që protestat kundër qeverisë të shtohen dhe se kryeministri Edi Rama duhet të largohet. Ajo argumentoi se ndryshimi duhet të prekë edhe sistemin aktual politik, i cili, sipas saj, u shërben interesave të një grupi të vogël njerëzish.
E pyetur nëse e sheh veten si udhëheqësen e ardhshme të Shqipërisë, deputetja tha se ambicia e saj është më e madhe se kurrë, por aktualisht synon t’i shërbejë vendit si deputete e pavarur.
“Ambicia ime është më e madhe se kurrë, por tani për tani e gjej më të rëndësishme t’i përkushtohem vendit tim si anëtare e pavarur e Parlamentit. Në fund të fundit, koha do të tregojë se kush mbijeton dhe kush jo. Por një gjë është e sigurt: ky nuk është fundi”, përfundoi ajo.
