1 në 38 fëmijë në botë është me spektër autik. Edhe pse Shqipëria nuk ka shifra zyrtare, ekspertët thonë se vitet e fundit ato janë në rritje. Ajo çfarë vihet re është ndërgjegjësimi i prindërve për ti çuar fëmijët tek specialisti në mosha të hershme.
“Para disa viteve rastet e paraqitura fillonin nga mosha 3 vjeç e sipër. Tani në vitet e fundit tendenca është ulur në 2 vjeç”, tha Juliana Esaj, profesioniste për diagnozë dhe terapinë e Autizmit, Farke
Për ekspertët 1 deri në 2 vjeç cilësohet si koha e artë për të konstatuar një problematikë, por jo për të dhënë diagnozë.
Por cilat janë ato shenja që shqetësojnë prindërit që i drejtohen specialistit për diagnozë.
“Gjëja më e shpeshtë që vënë re është e folura”, u shpreh Juliana Esaj.
Diagnostikimi dhe nisja e terapive në mosha të hershme do të ndihmonte në zhvillimin e fëmijës. Autizmi është një gjendje neurologjike që manifestohet gjatë fëmijërisë së hershme, i karakterizuar nga probleme në komunikimin shoqëror dhe gjuhësor, sjellje të përsëritura dhe interesa të kufizuara. Ende nuk dihen faktorët që shkaktojnë autizmin.
2 prilli është caktuar nga Asambleja e Përgjithshme e Kombeve të Bashkuara si Dita Botërore e Ndërgjegjësimit të Autizmit duke theksuar nevojën për të rritur ndërgjegjësimin e publikut rreth autizmit./Euronews Albania/
