Gjykata e Dibrës caktoi masën e sigurisë “arrest me burg” për Petrit Çakrrin dhe Fation Bushgjokën, të dyshuar për rrëmbimin dhe vrasjen e Renis Dobrës. Gjatë seancës që u zhvillua me dyer të mbyllura, ka pasur debate të forta mes dy të dyshuarve dhe prokurorit të çështjes.
Prokuroria pretendon se ka prova të forta për implikimin e tyre në rrëmbimin dhe vrasjen e të riut, ku ndër të tjera ata shfaqen së bashku në kamerat e sigurisë së një karburanti në zonë, ndërsa të dyshuarit thonë se kishin shkuar atje për të pikasur shtëpi që do t’i vidhnin.
Gjykata, pasi dëgjoi palët, vendosi t’i lërë në burg dy të dyshuarit.
Renis Dobra u rrëmbye në fshatin Zenisht. Ai u mbyt me litar dhe më pas trupi i pajetë u vendos në makinën e tij dhe u hodh në liqenin e Shkopetit. Nga rrokullisja, trupi i pajetë i Dobrës doli nga makina dhe u gjet të nesërmen në sektorin C buzë liqenit. Sipas policisë, dyshohet se Dobra u vra për shkak të prishjes së pazareve për drogë në Gjermani, ku kishte vuajtur një dënim prej 6 muajsh.
