Regjisorja Emerald Fennell ka zbuluar se një skenë nga adaptimi i saj i filmit “Lartësitë e stuhishme”, ku personazhi i luajtur nga Margot Robbie shfaqej me sqetulla me qime, nuk arriti të përfshihej në versionin final të filmit.
Fennell tha se ishte “për të ardhur keq” që skena u hoq, pasi për të ishte e rëndësishme që personazhi i Cathy të dukej sa më realist për periudhën historike të romanit.
“Kur shoh adaptime të Jane Austen gjithmonë mendoj: ku po i gjejnë briskët këto gra? Të gjitha duken krejtësisht pa qime. Është çmenduri,” u shpreh regjisorja gjatë një bisede në festivalin Hay në Uells.
Filmi, i publikuar këtë vit në Ditën e Shën Valentinit, është një version modern dhe provokues i romanit gotik të Emily Brontë, ku përveç Margot Robbie luan edhe Jacob Elordi.
Fennell tregoi gjithashtu detaje të tjera të pazakonta nga xhirimet, përfshirë të ashtuquajturën “dhoma e lëkurës”, ku muret e dhomës së Cathy-t u projektuan që të ngjanin me lëkurën e saj, deri në riprodhimin e venave të aktores në dekor.
Ajo foli edhe për një skenë tjetër të diskutuar, ku Cathy fut gishtin në gojën e një peshku të ngordhur. Sipas regjisores, për xhirimet u përdorën disa versione peshqish, përfshirë peshq të vërtetë dhe artificialë.
Fennell tha se i pëlqen të shtyjë kufijtë artistikë dhe se nuk ka frikë të krijojë skena që mund të konsiderohen të sikletshme apo provokuese për publikun.
