Nëse jeni nga ata persona që kthehen nga një mbrëmje verore me trupin plot pickime, ndërsa të tjerët mbeten pothuajse të paprekur, arsyeja nuk lidhet me “gjakun e ëmbël”, siç besohet shpesh.
Mushkonjat femra, të vetmet që pickojnë njerëzit, zgjedhin viktimat bazuar në sinjalet biologjike që lëshon trupi. Faktorët kryesorë janë dioksidi i karbonit që nxjerrim gjatë frymëmarrjes, temperatura e trupit dhe aroma natyrale e lëkurës.
Personat që prodhojnë më shumë dioksid karboni, si të rriturit, gratë shtatzëna ose ata që sapo kanë bërë aktivitet fizik, janë më tërheqës për mushkonjat. Edhe temperatura më e lartë e trupit dhe djersa rrisin gjasat për t’u pickuar.
Ndikim ka edhe aroma e lëkurës. Bakteret natyrale që gjenden në sipërfaqen e saj prodhojnë përbërje kimike që mushkonjat i dallojnë lehtësisht. Disa njerëz lëshojnë më shumë prej këtyre substancave, duke u bërë shumë më tërheqës për insektet.
Kjo prirje është kryesisht e lidhur me biologjinë e secilit dhe nuk ndryshon shumë nga mënyra e jetesës.
Për t’u mbrojtur, rekomandohet përdorimi i repelentëve kundër mushkonjave, veshja e rrobave me mëngë të gjata dhe përsëritja e aplikimit të repelentit, sidomos pas djersitjes. Ndërkohë, nuk ka prova të qarta që hudhra apo suplementet me vitaminë B i mbajnë larg mushkonjat.
Jo të gjithë reagojnë njësoj ndaj pickimeve. Disa persona zhvillojnë kruarje dhe ënjtje më të forta, çka krijon përshtypjen se pickohen më shpesh, edhe kur numri i pickimeve është i njëjtë.
