Një studim i ri i publikuar në revistën Nature Medicine sugjeron se mosha biologjike, dhe jo vetëm ajo kronologjike, mund të ndihmojë në shpjegimin pse disa lloje kanceri po diagnostikohen gjithnjë e më shpesh tek personat nën moshën 50-55 vjeç.
Vitet e fundit është vënë re një rritje e rasteve të tumoreve me shfaqje të hershme, veçanërisht të kancerit të zorrës së trashë, mitrës dhe, në disa grupe, të mushkërive. Shkencëtarët besojnë se nuk ka një shkak të vetëm, por një kombinim faktorësh si obeziteti, mungesa e aktivitetit fizik, dieta jo e shëndetshme, çrregullimet metabolike, ndotja, cilësia e dobët e gjumit dhe ndryshimet në mikrobiotën e zorrëve.
Studimi analizoi të dhënat e më shumë se 154 mijë të rinjve të përfshirë në UK Biobank, duke krahasuar moshën biologjike me atë kronologjike. Rezultatet treguan se personat me një moshë biologjike më të avancuar kishin një rrezik disi më të lartë për zhvillimin e tumoreve në moshë të re, sidomos të mushkërive, aparatit tretës dhe mitrës.
Studiuesit analizuan gjithashtu plakjen e organeve të veçanta. Ata zbuluan se plakja e sistemit imunitar lidhej me një rrezik më të lartë të kancerit të mushkërive, ndërsa plakja e indit dhjamor shoqërohej me rritjen e rrezikut për kancer të zorrës së trashë.
Megjithatë, autorët theksojnë se studimi nuk provon një lidhje shkak-pasojë. Ai tregon vetëm një lidhje statistikore mes plakjes biologjike dhe rrezikut për tumore. Faktorë të tjerë, si ndotja e mjedisit, mënyra e të ushqyerit, cilësia e gjumit, infeksionet, mikrobiota dhe kushtet socio-ekonomike mund të kenë gjithashtu një rol të rëndësishëm.
Sipas studiuesve, rëndësia e këtij hulumtimi qëndron në faktin se ai e zhvendos fokusin e parandalimit të kancerit drejt proceseve si inflamacioni kronik, metabolizmi, funksionimi i sistemit imunitar dhe plakja biologjike, të cilat mund të jenë çelësi për të kuptuar pse disa tumore po shfaqen gjithnjë e më herët.
