Ajo nisi gjithçka duke pastruar një tualet hapësinor gjatë praktikës së saj të parë, por sot është një nga figurat kryesore të eksplorimit të Marsit në Evropë.
Claire Parfitt, 42 vjeçe, me origjinë nga Nottinghami në Britaninë e Madhe, drejton një ekip në Agjencinë Evropiane të Hapësirës (ESA), i cili planifikon misionet e ardhshme njerëzore dhe robotike në Mars.
Historia e saj filloi në moshën 14-vjeçare, kur, pasi iu refuzua një kërkesë për praktikë në NASA, arriti të siguronte një vend pune në National Space Centre në Leicester. Aty, ndër detyrat e para, ishte edhe pastrimi dhe përgatitja për ekspozim e një tualeti të përdorur në misionet hapësinore.
“Që atëherë e kuptova se kjo ishte ajo që doja të bëja gjithë jetën,” kujton Parfitt.
Pas diplomimit në fizikë dhe përfundimit të doktoraturës në inxhinieri të sistemeve energjetike të anijeve kozmike, ajo iu bashkua industrisë së hapësirës, duke kontribuar në projekte të rëndësishme si roveri ExoMars Rosalind Franklin, i cili do të eksplorojë sipërfaqen e Marsit, si dhe misioni SMILE, që studion ndërveprimin mes erës diellore dhe fushës magnetike të Tokës.
Që nga viti 2019, Parfitt punon në Qendrën Evropiane të Kërkimit dhe Teknologjisë Hapësinore të ESA-s në Holandë. Ajo është gjithashtu kryetare e Grupit Ndërkombëtar të Punës për Eksplorimin e Marsit.
Sipas saj, Marsi mbetet një nga objektivat më të rëndësishëm shkencorë për njerëzimin.
“Nisja e roverit Rosalind Franklin në vitin 2028 do të jetë një moment jashtëzakonisht emocionues. Pas kësaj, na pret shumë punë për të përgatitur misionet e ardhshme me astronautë në Planetin e Kuq,” u shpreh ajo.
Parfitt e cilëson karrierën e saj një “ëndërr të bërë realitet”, ndërsa thotë se praktika e hershme në National Space Centre ishte momenti që i ndryshoi jetën dhe i hapi rrugën drejt eksplorimit të hapësirës.
