Dezinformatat që qarkullojnë në rrjetet sociale për suplementet ushqimore po janë bërë një shqetësim serioz për mjekët. Sipas një sondazhi të kryer nga World Cancer Research Fund, dy në pesë punonjës të shëndetësisë në sistemin britanik National Health Service përballen çdo javë me pacientë që besojnë informacione të pasakta për suplementet. Tek infermierët dhe mamitë kjo përqindje arrin në 53%.
Ekspertët paralajmërojnë se besimi i verbër te produktet e promovuara si “natyrale” ose “të sigurta” në rrjetet sociale mund të ketë pasoja serioze. Suplemente të njohura si shafrani i Indisë (turmeric), St John’s wort dhe magnezi mund të shkaktojnë efekte anësore ose të ndërveprojnë me barna të tjera. Për shembull, suplementet me shafran Indie janë lidhur me dëmtime të mëlçisë, ndërsa St John’s wort mund të ulë ose ndryshojë efektin e shumë ilaçeve.
Mjekja britanike Philippa Kaye thotë se çdo javë përballet me pacientë që mbërrijnë në ambulancë me video nga TikTok-u, postime në Facebook ose faqe të “wellness-it”, duke besuar se këshillat online janë më të sigurta se trajtimet e rekomanduara nga mjekët.
Sipas organizatës, po përhapen pretendime të rreme se produkte të ndryshme – nga vitamina C e deri te suplemente të pazakonshme – mund të parandalojnë ose madje të kurojnë kancerin. Megjithatë, nuk ka prova shkencore që mbështesin këto pretendime, ndërsa disa produkte mund të jenë edhe të rrezikshme.
Dietologia onkologjike Rachel White thekson se shumë pacientë me kancer përdorin suplemente me shpresën për të marrë kontroll mbi sëmundjen, por pa e kuptuar se disa prej tyre mund të ndërhyjnë në trajtimin mjekësor ose të shkaktojnë dëme.
Mesazhi i ekspertëve është i qartë: suplementet nuk janë të padëmshme vetëm sepse shiten pa recetë ose reklamohen si “natyrale”. Para se të merrni vitamina, minerale apo produkte bimore, këshillohuni gjithmonë me mjekun ose farmacistin, sidomos nëse vuani nga sëmundje kronike ose merrni terapi të rregullta.
