Valët ekstreme të të nxehtit dhe lagështia e lartë që po shoqërojnë ndeshjet e Kupës së Botës 2026 janë përkeqësuar nga ndryshimet klimatike të lidhura me përdorimin e lëndëve djegëse fosile, sipas një analize të grupit shkencor World Weather Attribution.
Shërbimi Kombëtar i Motit në SHBA ka njoftuar se një “kupolë nxehtësie” ka përfshirë pjesë të mëdha të Shteteve të Bashkuara dhe Kanadasë, duke bërë që indeksi i nxehtësisë të arrijë deri në 46 gradë Celsius në disa zona. Kushtet ekstreme pritet të ndikojnë jo vetëm në ndeshjet e Botërorit.
Profesoresha e shkencës së klimës, Friederike Otto, nga Imperial College London, tha se nuk nevojiten më studime të tjera për të kuptuar ndikimin e krizës klimatike.
“Ndryshimet klimatike janë tashmë këtu. Ato po ndikojnë në aktivitetet që ne i shijojmë çdo ditë dhe situata do të përkeqësohet sa më shumë të vonohet kalimi drejt emetimeve neto zero,” u shpreh ajo.
Temperaturat e larta janë kthyer në një nga temat kryesore të këtij Botërori, një vit pasi FIFPRO ngriti shqetësimin për rreziqet që paraqiste i nxehti ekstrem gjatë Kupës së Botës për Klube në SHBA.
Megjithëse FIFA ka ndërmarrë disa masa në planifikimin e kalendarit dhe përzgjedhjen e stadiumeve, organizata nuk ka ende një rregull që detyron shtyrjen automatike të ndeshjeve për shkak të temperaturave ekstreme. FIFPRO paralajmëron se, me ngrohjen globale në rritje, kushtet e motit do të kenë një rol gjithnjë e më të madh në organizimin e turneve dhe kampionateve në të ardhmen.
