Pas pesë ditësh protestash të pandërprera në Tiranë, organizatorët e lëvizjes kundër projektit të Zvërnecit dhe asaj që e cilësojnë si cenim të interesit kombëtar, kanë publikuar një deklaratë për shtyp ku shpallin zyrtarisht kërkesat e tyre dhe strukturën organizative të protestës.
Në deklaratë thuhet se lëvizja përfaqësohet nga një grup nismëtar dhe një grup koordinues qytetarësh, të cilët, sipas tyre, do të vazhdojnë ta çojnë kauzën përpara në përputhje me vullnetin e protestuesve.
Organizatorët shprehen se protesta ka lindur si reagim ndaj veprimeve të qeverisë dhe të klasës politike të tranzicionit, të cilat, sipas tyre, kanë dëmtuar interesin kombëtar dhe sigurinë kombëtare të vendit.
Ata theksojnë se protesta organizohet dhe drejtohet nga qytetarë të lirë dhe se nuk pranojnë përpjekjet për ta etiketuar apo për ta paraqitur si një nismë të kontrolluar nga faktorë politikë.
Në fund të deklaratës paraqiten pesë kërkesat që organizatorët i cilësojnë të qarta dhe të panegociueshme:
1. Dorëheqjen e qeverisë.
2. Shfuqizimin e statusit dhe të kuadrit ligjor që lidhet me investitorët strategjikë.
3. Shfuqizimin e Paketës së Maleve.
4. Anulimin e ndryshimeve në Ligjin për Zonat e Mbrojtura.
5. Anulimin e ndryshimeve në Ligjin për Trashëgiminë Kulturore.
“Këto nuk janë kërkesa politike. Janë kërkesa për drejtësi, ligjshmëri dhe mbrojtjen e interesit kombëtar”, thuhet në deklaratë.
Organizatorët shtojnë se nuk pranojnë negociata mbi të drejtat themelore të qytetarëve dhe mbi pasuritë publike, ndërsa paralajmërojnë vijimin e protestave deri në përmbushjen e kërkesave të shpallura.
