Qytetarët janë rikthyer sërish në protestë në zonën e Zvërnecit, ku parashikohet ndërtimi i një resorti turistik. Këtë herë, tubimi është zhvilluar në plazhin e Dalanit, ku protestuesit kanë organizuar një marshim sensibilizues kundër projektit, të cilin e konsiderojnë si një kërcënim për një zonë të mbrojtur dhe për interesin publik.
Gjatë protestës, qytetarët kanë artikuluar thirrje kundër rrethimit të zonës dhe kundër zbatimit të projektit. Njëri prej protestuesve deklaroi se ata nuk do të lejojnë vijimin e punimeve.
"Ne nuk i lejuam, e hodhëm gardhin poshtë. Ta çlirojmë Shqipërinë. U bëj thirrje vlonjatëve, a jeni pasardhës të Ismail Qemalit? Vlorës në 1920 iu bashkuan gjithë shqiptarët. Lufta u bë për Vlorën, Vlorën duan të marrin, por shqiptarët janë gjallë", u shpreh ai.
Protestat kundër këtij projekti nisën të shtunën e javës së kaluar, pas një incidenti të raportuar ku një protestues u tërhoq zvarrë nga dy punonjës të një kompanie private sigurimi, çka solli përshkallëzim të reagimeve dhe mobilizim qytetar në ditët në vijim.
