Fatmir Lleshaj, drejtori i Policisë së Shkodrës, ka dhënë detaje mbi mënyrën se si u zbuluan autorët e dyshuar dhe motivi i vrasjes së Ramazan Matajt.
Lleshaj deklaroi: “Kemi shoqëruar disa shtetas për t’i pyetur në lidhje me ngjarjen e vrasjes së Ramazan Matajt. Hetimet për këtë ngjarje vijojnë. Si rezultat i operacionit ‘Profili i Rremë’, kemi siguruar prova që çuan në identifikimin e autorëve të dyshuar. Arjol Hasaj, për motive të dobëta, ka kryer vrasjen duke komunikuar përmes profileve të rreme në Facebook, për t’i ngritur pritë viktimës. Ramazan Mataj kishte ndërhyrë në çështje që lidhen me prishjen e marrëdhënieve familjare. Vëllai i tij, Klisman Hasaj, ka ndihmuar autorin, ndërsa është sekuestruar edhe arma e krimit. Arjol Hasaj dyshohet për ‘vrasje me paramendim’, ndërsa Klisman Hasaj si bashkëpunëtor.”
Në përfundim, Lleshaj theksoi angazhimin e policisë për të intensifikuar hetimet për zbardhjen e ngjarjeve të mëparshme dhe ftoi qytetarët që të mbështesin policinë dhe të kenë besim te puna e saj për parandalimin e ngjarjeve kriminale.
