Presidentja e Kosovës, Vjosa Osmani, ka akuzuar Serbinë se vepron si instrument i Rusisë në përpjekjet për destabilizimin e Ballkanit Perëndimor, duke e cilësuar sjelljen e saj si agresion të mirëfilltë dhe jo thjesht “tensione” mes dy vendeve.
“Unë nuk do t’i quaja tensione mes Kosovës dhe Serbisë, sepse ne përpiqemi të mos biem në kurthin e barazimit të të dyja palëve. Ne nuk duhet t’i fusim kurrë në të njëjtin thes agresorin dhe viktimën,” deklaroi Osmani pas takimit me presidentin e Letonisë, Edgars Rinkeviç.
Sipas saj, Serbia përpiqet vazhdimisht ta destabilizojë Kosovën, përfshirë përmes akteve të agresionit.
“Ajo çfarë kemi bërë gjithmonë dhe do të vazhdojmë ta bëjmë, është ta mbrojmë pavarësinë tonë, ta mbrojmë integritetin tonë territorial, ta mbrojmë paqen dhe lirinë, që janë fituar me shumë sakrificë,” shtoi presidentja.
Megjithatë, në këtë dalje të fundit publike, Osmani nuk e përsëriti deklaratën e saj të mëhershme nga Washingtoni, ku pati thënë se presidenti amerikan Donald Trump kishte ndërhyrë “shumë vonë” për të parandaluar një përshkallëzim të madh tensioni mes Kosovës dhe Serbisë.
Ajo deklaratë u bë shkak për reagime të ashpra në SHBA. Ish-i dërguari i posaçëm i Trump për dialogun Kosovë-Serbi, Richard Grenell, e kritikoi hapur Osmanin, duke e akuzuar se kishte keqinterpretuar apo tjetërsuar fjalët e ish-presidentit amerikan. Grenell këmbënguli se nuk kishte pasur asnjë lloj ndërhyrjeje të tillë nga Trump “në ndonjë moment të fundit,” duke e cilësuar pretendimin e Osmanit si të pabazuar.
Pas këtyre polemikave, presidentja e Kosovës ka zgjedhur të mos komentojë më për rolin e Trump, duke u përqendruar në mesazhin se Serbia është “dorë e zgjatur e Kremlinit” në rajon dhe se Kosova po vepron vetëm në vetëmbrojtje.
Vizita e Osmanit në Letoni vjen në një kohë kur shtetet baltike po kërkojnë koordinim më të ngushtë me vendet e Ballkanit përballë rrezikut të ndikimit rus.
