Nga rrugica përpara shtëpisë së Sali Berishës, që demokratët e quajnë “rruga e shpresës” mbështetesit e Sali Berishës do të zhvendosen te sheshi përpara SPAK-ut, aty ku pritet të mbahet protesta e radhës në mbështetje të ish-kryeministrit.
Sot Sali Berisha në orën 12:00 do të përballet me prokurorët dhe do të shpallet zyrtarisht i pandehur. Flamur Noka ka dërguar një mesazh anëtarëve të kryesisë për të mobilizuar mbështetje për kryetarin e PD-së, Berisha. Gazment Bardhi ripërsëriti të njëjtën thirrje. Protestuesit pritet të jenë të qetë, pa incidente të planifikuara.
Sali Berisha pritet të përdorë këtë moment për t’iu drejtuar publikut përmes mediave, pas 10 muajsh mungese për shkak të arrestit shtëpiak.
Objektivat e akuzave të tij do të jenë SPAK dhe kundërshtari i tij politik, Edi Rama.
Pavarësisht rrjedhës së ngjarjeve, një gjë është e sigurt: pozita e Sali Berishës përballë drejtësisë rëndohet dhe ai shkon me një barrë edhe më të madhe drejt zgjedhjeve të 2025-ës.
