Mijëra qytetarë u mblodhën të shtunën në Novi Sad për të përkujtuar 16 viktimat e tragjedisë së vitit 2024, kur u shemb streha e stacionit hekurudhor, dhe për të kërkuar zhvillimin e zgjedhjeve të parakohshme parlamentare. Protesta, e udhëhequr nga studentët, është kthyer në sfidën më të madhe ndaj presidentit Aleksandar Vuçiç dhe Partisë Progresive Serbe, që qeverisin vendin prej 13 vitesh.
Protestuesit, opozita dhe organizatat e të drejtave të njeriut e konsiderojnë tragjedinë si simbol të korrupsionit dhe keqmenaxhimit të projekteve publike. Në temperaturat e larta të ditës, mijëra persona brohoritën “Fitore”, duke mbajtur pankarta dhe bluza me mbishkrimin “Studentët po fitojnë”.
Aktivistët synojnë të sfidojnë Vuçiçin dhe partinë e tij në zgjedhjet parlamentare dhe presidenciale. Edhe pse ato janë planifikuar për vitin 2027, presidenti serb ka lënë të hapur mundësinë e mbajtjes së tyre më herët. Protestuesit akuzojnë qeverinë për manipulim zgjedhor, kufizim të lirisë së medias, korrupsion dhe lidhje me krimin e organizuar, akuza që Vuçiç dhe aleatët e tij i mohojnë.
Në një dalje televizive që përkoi me protestën, Vuçiç njoftoi se mbështetësit e tij do të mblidhen më 27 qershor, duke i ftuar qytetarët të bashkohen “nën flamurin serb”.
Serbia mbetet vend kandidat për anëtarësim në Bashkimin Evropian, por Brukseli i ka kërkuar Beogradit të garantojë zgjedhje të lira dhe të ndershme, të forcojë pavarësinë e drejtësisë dhe të luftojë korrupsionin dhe krimin e organizuar.
