Kryeministrja e Italisë, Giorgia Meloni, ka njoftuar mbledhjen e qeverisë italiane nesër për të diskutuar qendrat e emigrantëve të ngritura në Gjadër dhe Shëngjin. Në një deklaratë nga Finlanda, ajo theksoi se Gjykata e Kasacionit i ka dhënë të drejtë qeverisë për të vendosur mbi vendet e sigurta, duke kufizuar ndërhyrjet e gjykatësve në raste specifike.
Në këtë takim do të marrin pjesë ministri i Brendshëm Matteo Piantedosi, zv.kryeministri dhe ministri i Jashtëm Antonio Tajani, si dhe zyrtarë të tjerë të lartë të qeverisë italiane. Sipas Melonit, Italia është vendi i parë që ka arritur një marrëveshje të tillë me një shtet jashtë Bashkimit Evropian, duke e cilësuar këtë si një model të ri për trajtimin e çështjeve të emigracionit.
Deklaratat u bënë gjatë Samitit Veri-Jug në Saariselkä, Finlandë, ku Meloni foli edhe për kërcënimet ruse dhe ndikimin e organizatave kriminale në sigurinë e Evropës. Ajo theksoi se: “Kërcënimi është më i madh se sa imagjinojmë, përfshin demokracinë tonë dhe shfrytëzimin e emigracionit.”
