Luciano Spalletti nuk do të jetë më në krye të pankinës së kombëtares italiane të futbollit. Humbja e thellë 3-0 ndaj Norvegjisë në sfidën kualifikuese për Kupën e Botës ka qenë vendimtare për të ardhmen e teknikut 66-vjeçar, i cili do të largohet zyrtarisht pas ndeshjes së radhës.
Lajmin e ka konfirmuar vetë Spalletti për mediat, duke zbuluar se ka zhvilluar një takim me presidentin e Federatës Italiane të Futbollit (FIGC), Gabriele Gravina. Gjatë këtij takimi, Gravina i ka komunikuar trajnerit vendimin e federatës për ta larguar nga posti i tij, pavarësisht dëshirës së Spallettit për të vijuar punën në drejtimin e skuadrës.
“Ishte një bisedë e sinqertë. E kuptoj që rezultatet kanë peshën e tyre, edhe pse unë do të kisha dashur të vazhdoja këtë rrugëtim me këta djem. Uroj që ekipi të gjejë forcën dhe energjinë për të reaguar,” ka deklaruar Spalletti.
Megjithatë, ai do të ulet për herë të fundit në stolin e “axurrëve” në ndeshjen e fundit të këtij cikli, më 9 qershor ndaj Moldavisë, një sfidë që tashmë nuk ka ndikim në klasifikim, por që do të shërbejë si përmbyllje e mandatit të tij.
Ndërkohë, në ambientet e futbollit italian kanë nisur menjëherë spekulimet për emrin e trajnerit që do të pasojë Spallettin. Sipas raportimeve të para, dy prej alternativave më të përfolura janë Stefano Pioli, ish-trajner i Milanit, dhe Roberto Mancini, që në të kaluarën ka udhëhequr Italinë drejt triumfit në Euro 2020.
Vendimi për trajnerin e ri pritet të merret gjatë javëve të ardhshme, ndërkohë që drejtuesit e federatës pritet të zhvillojnë një analizë të thelluar të situatës dhe të profilit që kërkojnë për këtë rol të rëndësishëm, teksa Italia synon të rifitojë besimin e tifozëve dhe të rikthehet në nivelin më të lartë të garave ndërkombëtare.
