Këshilli Ndërfetar i Shqipërisë ka reaguar ndaj miratimit të Udhëzuesit të Praktikës Klinike “Për trajtimin hormonal të personave transgjinorë”, i cili për herë të parë krijon mundësinë që kjo terapi të ofrohet në sistemin publik shëndetësor në vend.
Përmes një deklarate publike, Këshilli thekson se çështje të tilla, për shkak të ndikimit të tyre shoqëror, etik, mjekësor dhe antropologjik, kërkojnë transparencë të plotë institucionale, konsultim të gjerë profesional dhe debat publik të informuar.
Sipas Këshillit Ndërfetar, çdo protokoll apo ndërhyrje mjekësore me pasoja afatgjata fizike, psikologjike dhe sociale duhet të mbështetet në standarde të qarta shkencore, bazë të qëndrueshme juridike dhe procedura transparente vendimmarrjeje.
Në këtë kuadër, Këshilli u kërkon institucioneve përgjegjëse të publikojnë bazën shkencore dhe mjekësore mbi të cilën është hartuar udhëzuesi, argumentet shkencore, mjekësore dhe etike që kanë justifikuar miratimin e tij me procedurë të përshpejtuar, si dhe bazën juridike dhe kompetencat ligjore që kanë shërbyer për nxjerrjen e urdhrit.
Një tjetër shqetësim i ngritur lidhet me përfshirjen e të miturve në këtë rregullim. Këshilli kërkon sqarime mbi kriteret dhe arsyetimin që kanë çuar në përfshirjen e kësaj kategorie në trajtimet hormonale.
Gjithashtu, KNFSH kërkon një shpjegim publik mbi bazën juridike që autorizon personelin mjekësor të aplikojë trajtime hormonale për personat transgjinorë, duke argumentuar se legjislacioni shqiptar nuk parashikon aktualisht një kuadër të posaçëm dhe të detajuar për këtë kategori.
Këshilli Ndërfetar vlerëson se natyra komplekse e këtyre trajtimeve dhe pasojat e tyre afatgjata kërkojnë një debat të gjerë kombëtar dhe konsultim multidisiplinar me ekspertë të mjekësisë, bioetikës, psikologjisë, të drejtës dhe përfaqësues të shoqërisë civile.
Në deklaratë, Këshilli rithekson gjithashtu qëndrimin e komuniteteve fetare që përfaqëson, sipas të cilit identiteti njerëzor dhe dallimi ndërmjet burrit dhe gruas konsiderohen pjesë themelore e natyrës njerëzore të dhënë nga Zoti.
Për këtë arsye, Këshilli shpreh rezervat dhe shqetësimet e tij ndaj ndërhyrjeve mjekësore që synojnë ndryshimin e karakteristikave biologjike gjinore, duke argumentuar se procedura të tilla prekin konceptin natyror të personit dhe të familjes sipas traditës fetare.
Në përfundim, Këshilli Ndërfetar i Shqipërisë bën thirrje për përgjegjësi institucionale, transparencë dhe respekt ndaj dinjitetit njerëzor, familjes dhe vlerave themelore shoqërore.
