Prokuroria Themelore në Gjakovë ka kërkuar një muaj paraburgim për katër shtetas serbë të arrestuar gjatë fundjavës në qytetin jugperëndimor të Kosovës, nën akuzën e shkeljes së ligjit të armëve. Të dyshuarit u kapën me armë të ftohta gjatë vizitës së tyre në disa manastire ortodokse në Kosovë të shtunën. Në automjetin e tyre tip Toyota, Policia e Kosovës gjeti një sëpatë, një thikë me këllëf dhe një thikë sharrë.
Përveç këtyre arrestimeve në Gjakovë, autoritetet kosovare ndaluan edhe 12 persona të tjerë në Prizren. Ministri në detyrë i Punëve të Brendshme të Kosovës, Xhelal Sveçla, deklaroi se ndalimet u kryen gjatë një operacioni dy-ditor, duke shtuar se të ndaluarit po udhëtonin me katër automjete me targa nga Kragujevci, Serbi. Sipas Sveçlës, këto grupe dyshohet se kishin për qëllim mbledhjen e informacioneve, pasi u gjetën dëshmi të lidhjeve me strukturat e inteligjencës ushtarake serbe dhe me anëtarë të grupit terrorist të Banjskës.
Zyra për Kosovën në Qeverinë e Serbisë reagoi ndaj këtyre zhvillimeve, duke njoftuar se gjykata kishte urdhëruar që katër serbët e arrestuar në Gjakovë të mbaheshin në paraburgim për 48 orë. Lidhur me 12 të arrestuarit në Prizren, dy prej tyre po mbahen në paraburgim, ndërsa të tjerët u liruan pas marrjes në pyetje dhe u kthyen në Serbi.
Ndërkohë, mëngjesin e së hënës, disa faqe zyrtare të ministrive në Kosovë, përfshirë portalin E-Kosova, u goditën nga sulme kibernetike, duke shkaktuar ndërprerje në funksionimin e tyre. Autoritetet kosovare kanë raportuar më parë për sulme të ngjashme, duke akuzuar hakerët rusë për këto veprime, veçanërisht pas mbështetjes së Kosovës për Ukrainën.
