Qeveria e Kosovës ka mbledhur këtë të diel Këshillin e Sigurisë, pas shqetësimeve në rritje për përpjekjet e Serbisë për të ndërhyrë në procesin e formimit të institucioneve të reja të legjislaturës së nëntë. Në njoftimin zyrtar të shpërndarë pas mbledhjes, autoritetet e Prishtinës kanë akuzuar Beogradin për përfshirje direkte në procesin zgjedhor të 9 shkurtit përmes Listës Serbe, duke shtuar se Serbia po përdor shantazhe, kërcënime dhe joshje për të ndikuar mbi deputetë të komuniteteve joshumicë e joserbe.
“Serbia po ndërhyn në mënyrë të drejtpërdrejtë te disa prej deputetëve të komuniteteve joshumicë, me qëllim sabotimin e formimit të institucioneve të reja. Ajo po nxit tensione ndëretnike dhe ndërpartiake për të destabilizuar vendin”, thuhet në deklaratën e qeverisë Kurti. Këto akuza janë mbështetur edhe nga partnerë ndërkombëtarë, përfshirë Gjermaninë dhe misionin e Bashkimit Evropian për monitorimin e zgjedhjeve, të cilët kanë shprehur shqetësime mbi ndikimin e Beogradit në procesin elektoral në Kosovë.
Mbledhja e Këshillit të Sigurisë ka adresuar gjithashtu edhe çështje të tjera me ndikim në sigurinë kombëtare, si sulmi me granata dore ndaj Zyrës së Postës së Kosovës në Zveçan më 1 prill. Në fokus të diskutimeve ishte edhe arrestimi i katër shtetasve serbë në Gjakovë të shtunën në mbrëmje, përfshirë një toger të policisë së Serbisë dhe një kapiten të ushtrisë serbe. Sipas raportit 24-orësh të policisë, në veturën e tyre me targa serbe janë gjetur dhe sekuestruar dy thika dhe një sëpatë.
Zyrtarët kosovarë i kanë cilësuar këto ngjarje si pjesë të një skeme më të gjerë destabilizuese nga Serbia, e cila sipas tyre po përpiqet të minojë rendin kushtetues dhe sigurinë në vend përmes mjeteve të infiltrimit politik, presionit mbi komunitetet joshumicë dhe veprimeve të drejtpërdrejta në terren. Në këtë kuadër, autoritetet në Prishtinë kanë kërkuar vigjilencë të shtuar nga institucionet e sigurisë dhe mbështetje të vazhdueshme nga partnerët ndërkombëtarë.
