Zyra e Rregullatorit të Energjisë (ZRrE) ka paralajmëruar një rritje prej 15% të çmimit të energjisë elektrike në Kosovë, një vendim që ka shkaktuar shqetësim dhe pakënaqësi të madhe në opinionin publik.
Të shtunën, më 5 prill 2025, në Prishtinë do të mbahet protestë kundër rritjes së çmimit të energjisë elektrike, ku aktivistë dhe qytetarë do të mblidhen për të kundërshtuar shtrenjtimin e rrymës.
Qytetarët, bizneset dhe ekspertët ekonomikë kanë shprehur shqetësim se kjo rritje do të ndikojë negativisht në ekonominë e familjeve dhe sektorët e ndryshëm, duke shtuar ngarkesën financiare për shumë grupe sociale.
Ish-ministri i Tregtisë, Ismet Mulaj, është shprehur se shtrenjtimi i çmimit të energjisë elektrike për 15% do të favorizojë operatorët privatë të energjisë, duke dëmtuar qytetarët.
“Ky vendim do të jetë në funksion të operatorëve ekonomikë privatë që tregtojnë energji elektrike, sesa në favor të qytetarëve”, theksoi Mulaj.
Sipas Mulajt, më shumë se 1,300 biznese do të kalojnë në tregun e lirë, ku do të blejnë energjinë nga operatorët privatë.
“Mbi 1,300 biznese do të dalin në tregun e lirë dhe ato biznese që dalin në tregun e lirë do ta blejnë energjinë nga operatorët. Kjo i jep hapësirë operatorëve për të përfituar dhe kështu dëmtohet qytetari.
Nëse 1,000-2,000 biznese dalin në tregun e lirë, pse atëherë duhet të ketë rritje të çmimit të energjisë elektrike?”, thotë Mulaj.
