Një ditë para se ish-kryeministri Sali Berisha të paraqitet në SPAK për të njohur përfundimin e hetimeve lidhur me privatizimin e ish-kompleksit sportiv "Partizani," Gjykata e Lartë do të shqyrtojë çështjen e vulës dhe logos së Partisë Demokratike në dhomë këshillimi. Kolegji Civil, i përbërë nga gjyqtarët Enton Dhimitri, Margarita Buhali dhe Valbona Cekrezi, do të marrë vendim mbi bazën e dokumenteve.
Kjo çështje ka kaluar disa faza gjyqësore, ku vendimet e mëparshme kanë njohur Sali Berishën dhe Komisionin e Rithemelimit si përfaqësues legjitim të PD-së, duke pranuar ndryshimet e kuvendit të datës 11 dhjetor 2021, që shkarkoi Lulzim Bashën nga pozita e kryetarit të partisë. Megjithatë, Enkelejd Alibeaj paraqiti rekurs në Gjykatën e Lartë kundër vendimeve të Apelit dhe Gjykatës së Tiranës, të cilat kishin njohur Komisionin e Rithemelimit si autoritetin e ligjshëm të PD-së.
Nga ana tjetër, Berisha është nën hetim nga SPAK për akuza të korrupsionit, pasi dyshohet se ka favorizuar dhëndërrin e tij, Jamarbër Malltezi, në privatizimin e ish-kompleksit sportiv "Partizani." Të mërkurën, Berisha pritet të ballafaqohet me prokurorët për t'u njohur me përfundimin e hetimeve.
