Gjykata e Posaçme e Shkallës së Parë për Korrupsionin dhe Krimin e Organizuar ka vendosur të vazhdojë masën e sigurisë “Arrest në burg” për kryetarin e Bashkisë së Tiranës, Erion Veliaj. Ky vendim u mor pas një seance gjyqësore që zgjati mbi 6 orë.
Ndërkohë, për bashkëshorten e tij, Ajola Xoxa, gjykata ka zëvendësuar masën e sigurisë nga “Arrest në shtëpi” në “Ndalim të daljes jashtë shtetit” dhe “Detyrim për t’u paraqitur në policinë gjyqësore”. Ajo duhet të paraqitet në SPAK të premten e parë dhe të tretë të çdo muaji.
Gjithashtu, gjykata ka vendosur për masat e sigurisë ndaj personave të tjerë të përfshirë në këtë çështje:
• Elman Abule: Vazhdimi i masës “Arrest në burg”.
• Gentjan Sula: Vazhdimi i masës “Detyrim për t’u paraqitur në policinë gjyqësore”.
• Meriman Palushi: Vazhdimi i masës “Detyrim për t’u paraqitur në policinë gjyqësore”.
• Fatmir Bektashi: Urdhërohet të paraqitet para oficerëve të policisë gjyqësore të premten e parë dhe të tretë të çdo muaji.
• Shkëlqim Fusha: Vazhdimi i masës “Detyrim për t’u paraqitur në policinë gjyqësore”.
Erion Veliaj po shoqërohet nga Drejtoria e Përgjithshme e Burgjeve në burgun e Durrësit.
