Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtor dhe ka dënuar me 2 vite e 4 muaj burg ish-shefin e Antidrogës së Durrësit, Gazmir Preçi, për veprën penale “Korrupsioni pasiv i personave që ushtrojnë funksione publike”.
Preçi përfitoi uljen e një të tretës së dënimit për shkak të gjykimit të shkurtuar, duke vuajtur 2 vite e 4 muaj nga 3 vite e 6 muaj burgim që ishte dënimi fillestar.
Nga hetimet ka rezultuar se Gazmir Preçi ka marrë një shumë prej 10 mijë euro nga shtetasi B.T., në këmbim të mosushtrimit të kontrolleve policore në një lokal nate pranë Urës së Dajlanit në Durrës, ku ushtrohej aktivitet “muzikë live” dhe ishin punësuar shtetas shqiptarë dhe të huaj.
Preçi ishte akuzuar se kishte kërcënuar pronarin e lokalit me vendosje gjobe duke i kërkuar fillimisht 20 mijë euro. Pas hetimeve të SPAK, GJKKO e gjeti fajtor për korrupsion pasiv dhe vendosi dënimin me burgim.
