Më 6 tetor 2024, në kampin e refugjatëve Jabaila në Veri të Gazës, nga goditjet ajrore u vra gazetari 19-vjeçar Hasan Hamad. Hasani ishte viktima më e fundit në radhën e 128 gazetarëve dhe punonjësve të medias të vrarë gjatë një viti, sipas Komitetit për Mbrojtjen e Gazetarëve, që nga shpërthimi i konfliktit në Gaza më 7 tetor 2023. Federata Ndërkombëtare e Gazetarëve raportoi se në vitin 2023 u vranë gjithsej 120 gazetarë dhe punonjës të mediave. Prej tyre, 4 ishin në Europë, 3 në Ukrainë dhe 1 në Shqipëri. Viti 2023 konsiderohet si një ndër më të përgjakshmit për gazetarët dhe punonjësit e medias.
Nuk ka më rëndësi nëse Hasan Hamad, sipas raportimeve të mediave, u vra qëllimisht pas kërcënimeve të marra nga një oficer izraelit, i cili i kërkonte të ndërpriste filmimet në Gaza. Edhe nëse ai u vra aksidentalisht, si “dëm anësor” i konfliktit, fakt mbetet se profesioni i gazetarit është shndërruar në një profesion tejet të rrezikshëm.
Sot, më 7 tetor 2024, si gazetarë, e ndjejmë për detyrë të bëjmë këtë shënim kujtese në respekt të kolegëve tanë në Gaza dhe në zona të tjera konflikti ose jo, të cilët kanë paguar me jetën e tyre përkushtimin ndaj këtij profesioni, pa përmendur arrestimet, censurën dhe shkatërrimin e objekteve mediatike. Këto ngjarje dëshmojnë se liria e medias, veçanërisht kur përpiqet të dokumentojë konflikte dhe krime, mbetet vazhdimisht nën kërcënim. Megjithatë, gazetaria e vërtetë nuk është në rrezik të zhduket. Gazetarët e përkushtuar për të vërtetën, pavarësisht se sa të paktë janë, vazhdojnë të mbrojnë dinjitetin e profesionit të tyre.
