Një vatër e madhe zjarri ka përfshirë zonën e fshatit Plan i Bardhë në Bashkinë Klos, duke shkaktuar dëme materiale dhe duke vënë në rrezik infrastrukturën në zonë.
Flakët nisën fillimisht në një sipërfaqe me ferra dhe dushqe, por për shkak të erës së fortë u përhapën me shpejtësi, duke përfshirë edhe një banesë. Sipas autoriteteve, shtëpia e prekur nga zjarri ishte e pabanuar. Ndërkohë, në perimetrin e vatrës rrezikohet edhe një kabinë elektrike.
Në vendngjarje janë angazhuar forcat zjarrfikëse nga Klosi, Burreli dhe Bulqiza, ndërsa priten të mbërrijnë ekipe të tjera nga Dibra dhe forca të Ushtrisë për shkak të përmasave të zjarrit. Autoritetet u kanë bërë thirrje banorëve të shmangin zonën dhe të ndjekin udhëzimet e strukturave të emergjencës.
