Fatmir Xhafaj u ka kujtuar krerëve të ILD-së dhe KLGJ-së se çfarë roli duhet të luajnë në zgjidhjen e ngërçit mes avokatëve dhe GJKKO-së, duke kërkuar më shumë angazhim institucional për një konflikt që vijon të pengojë zhvillimin normal të proceseve gjyqësore.
Gjatë diskutimeve në Komisionin për Nismat Qytetare, Bashkëpunimin dhe Mbikëqyrjen Institucionale, kryetari i tij, Fatmir Xhafaj, ia drejtoi fillimisht kërkesën Inspektorit të Lartë të Drejtësisë, Artur Metani, të cilin e pyeti nëse ILD-ja mund të ndërhyjë, brenda kompetencave ligjore, për të ndihmuar në kapërcimin e situatës.
Metani tha se institucioni po e ndjek me vëmendje konfliktin, por theksoi se zgjidhja kërkon diskutime mes palëve dhe se kompetencat e ILD-së nuk e bëjnë të thjeshtë një ndërhyrje të tillë.
Përgjigjja nuk e bindi Xhafajn, i cili këmbënguli se ekzistojnë hapësira për ndërhyrje, veçanërisht kur situata prek procesin e rregullt ligjor dhe rrezikon të zgjasë edhe më tej proceset gjyqësore.
Por nëse nga kreu i ILD-së mori një përgjigje të kujdesshme për kufijtë e kompetencave ligjore, me kreun e Këshillit të Lartë Gjyqësor, Ilir Rusi, diskutimi mori një tjetër drejtim.
Rusi deklaroi se rregullorja e GJKKO-së për ndalimin e celularëve gjatë seancave është kompetencë e vetë gjykatës dhe se kush e kundërshton duhet ta ankimojë.
Këtu Xhafaj nuk e fshehu pakënaqësinë. Ai i kujtoi kreut të KLGJ-së se Këshilli ishte mbledhur me urgjencë për çështjen e pagave të gjyqtarëve, ndërsa për konfliktin që ka vënë përballë avokatët dhe GJKKO-në, sipas tij, po tregohej më pak aktiv.
“Për mua keni detyrim që ta bëni këtë. Kërkojmë rol proaktiv në trajtimin dhe zgjidhjen e ngërçit të krijuar në GJKKO. Uluni me këshillin e gjykatës, avokatët dhe bëni qëndrim institucional publik për këtë çështje”, u shpreh Xhafaj.
Kryetari i komisionit, Fatmir Xhafaj, duket se nuk e fsheh dëshirën për t’u treguar krerëve të institucioneve të drejtësisë se si duhet të veprojnë, duke marrë rolin e atij që u kujton detyrimet dhe u dikton ritmin e ndërhyrjes.
Ndërkohë, rregullorja e GJKKO-së vijon të kundërshtohet nga avokatët dhe mediat për kufizimet që, sipas tyre, cenojnë të drejtat e mbrojtjes dhe lirinë e informimit. Çështja ka përfunduar në Gjykatën Kushtetuese, ndërsa zgjidhja e ngërçit mbetet ende një sfidë për institucionet përgjegjëse.
