Në një kohë kur politika shqiptare përballet me digjitalizim, inteligjencë artificiale dhe debate komplekse kushtetuese, dy qytetarë kanë vendosur se fati i kombit mund të ndryshohet fare mirë me vetëm një fletë fletoreje me kuadrate dhe një laps me bojë.
Në protokollin e Komisionit Qendror të Zgjedhjeve, sot, ka mbërritur një kërkesë mjaft e pazakontë e shkruar me dorë.
Dy protagonistët – Erald Zef Ndji (banues në Mamurras, Kurbini) dhe Andi Thanas Bërtëllima (me origjinë nga Mollasi i Elbasanit e me banim në Vlorë) – i janë drejtuar organit më të lartë zgjedhor me një kërkesë solemne: pajisjen me formularë nënshkrimesh për mbledhjen e firmave për themelimin e lëvizjes “Iliria”.
Pasi kanë bashkuar aksin gjeografik Kurbin–Vlorë, ideatorët e kësaj nisme u kanë treguar të gjithëve se mungesa e një kompjuterit apo shtypshkronje nuk përbën asnjë pengesë kur “atdhedashuria” vlon në venat e tyre. Me sa duket, për të bërë historinë mjafton një shkrim dore dhe vullneti i hekurt për t’iu drejtuar shtetit zyrtar!
Përtej dozave të humorit dhe naivitetit burokratik, kjo kërkesë zbulon edhe një ngatërresë të thellë konceptuale me kuadrin ligjor në Shqipëri.
Iniciatorët duket se kanë ngatërruar procedurën e krijimit të një subjekti politik apo lëvizjeje me nismat ligjvënëse popullore apo referendum3t:
Si themelohet një lëvizje ose parti politike? Në kuadrin ligjor shqiptar (Ligji për Partitë Politike), krijimi i një organizate apo partie politike bëhet përmes mbledhjes vullnetare të anëtarëve dhe regjistrimit në Gjykatën e Rrethit Gjyqësor Tiranë, pa asnjë nevojë apo kompetencë nga ana e KQZ-së për të shpërndarë “formularë zyrtarë” themelimi.
KQZ-ja pajis me formularë zyrtarë mbledhjeje firmash vetëm grupet nismëtare që kërkojnë realizimin e një nisme ligjvënëse nga zgjedhësit (Kushtetuta, Neni 81/1 – mbledhja e 20,000 firmave për të kaluar një projektligj në Kuvend) ose për kërkesa referendumi.
Përrallat politike që nisin me laps e letër në distancën Mamurras–Vlorë padyshim që i kanë dhënë pak ngjyra ditës në administratën e KQZ-së, por organizatorëve do t’u duhet së pari të gjejnë rrugën për në gjykatë përpara se të kërkojnë vulat e Komisionit Zgjedhor.
