Presidenti i Serbisë, Aleksandar Vuçiç, ka vlerësuar kryeministrin Edi Rama si një nga pasuritë më të mëdha të Shqipërisë, ndërsa ka komentuar protestat që po zhvillohen prej ditësh në vend dhe pasojat e mundshme politike për kreun e qeverisë shqiptare.
Gjatë emisionit “Prva tema”, të transmetuar mbrëmjen e 21 tetorit në televizionin serb Prva, Vuçiç foli për situatën në Shqipëri, duke u ndalur te mënyra se si Rama është përballur me protestuesit.
“Rama bëri një gabim. Edi besoi më gjatë se unë se mund t’i zbuste disi. Dhe gaboi. Humbi kohë. Nëse e detyrojnë të shpallë zgjedhje, do ta ketë shumë të vështirë t’i fitojë”, deklaroi presidenti serb.
Megjithatë, Vuçiç shprehu një vlerësim të lartë për kryeministrin shqiptar.
“E gjithë kjo më duket irracionale, sepse ai është një nga pasuritë më të mëdha të Shqipërisë, sido që ta shikosh”, u shpreh ai.
Deklaratat e presidentit serb u bënë gjatë një diskutimi më të gjerë për protestat në Shqipëri dhe Francë, si dhe për zhvillimet politike që kanë shoqëruar lëvizjet studentore në rajon.
Vuçiç foli gjithashtu për protestat në Serbi dhe reagimin e autoriteteve, duke pretenduar se policia serbe nuk kishte përdorur autobotë uji kundër protestuesve.
Komentet e tij për Edi Ramën vijnë në ditën e dhjetë të protestave në Shqipëri, ku studentë dhe qytetarë kanë kërkuar dorëheqjen e kryeministrit.
Rama ka vijuar thirrjet për dialog, ndërsa protestuesit kanë refuzuar ofertat e tij dhe kanë këmbëngulur në kërkesën për largimin e tij nga pushteti.
