Studentë, pedagogë dhe qytetarë janë mbledhur këtë të enjte përpara Kuvendit të Shqipërisë, duke vijuar për të dhjetën ditë radhazi protestat kundër qeverisë së kryeministrit Edi Rama. Tubimi po zhvillohet ndërsa brenda Parlamentit mbahet seanca plenare, e cila është shoqëruar me tensione dhe përplasje mes deputetëve të mazhorancës dhe opozitës.
Protestës së sotme i janë bashkuar edhe studentët e Universitetit të Mjekësisë, të cilët mbështesin kërkesën për dorëheqjen e kryeministrit. Ndërkohë, pedagogët janë nisur në marshim nga Korpusi Qendror i Universitetit Politeknik të Tiranës drejt Kuvendit, për t'iu bashkuar të rinjve.
Gjatë tubimit, disa protestues kanë hequr barrierat metalike të vendosura përpara godinës së Parlamentit. Pavarësisht kësaj, forca të shumta policie vijojnë të qëndrojnë në zonë, duke krijuar një kordon për të penguar afrimin e protestuesve drejt hyrjes së institucionit.
Situata jashtë Kuvendit mbetet e tensionuar, ndërsa studentët, pedagogët dhe qytetarët vijojnë të kërkojnë plotësimin e kërkesave të tyre. Pedagogët kanë njoftuar gjithashtu bojkotimin e mësimdhënies në universitetet publike, një vendim që do të mbetet në fuqi deri në një njoftim të dytë.
Ndërkohë, tensionet jashtë Parlamentit janë shoqëruar edhe me debate të ashpra brenda sallës së Kuvendit, ku seanca plenare nisi me përplasje mes përfaqësuesve të mazhorancës dhe opozitës.
Mbetet për t’u parë nëse protesta do të vijojë paqësisht apo nëse përballja mes protestuesve dhe forcave të policisë do të përshkallëzohet në incidente të tjera.
