Trazirat dhe përplasjet gjatë protestës së fundit kanë kaluar tashmë në rrugë ligjore.
Dy prokurorë të Prokurorisë së Rrethit Gjyqësor Tiranë kanë zbarkuar pasditen e sotme në ambientet e Spitalit të Traumës për të nisur mbledhjen e provave materiale lidhur me protestuesit e lënduar.
Sipas burimeve të konfirmuara, grupi i hetuesve ka nisur menjëherë punën në terren duke sekuestruar kartelat mjekësore, fletë-daljet, si dhe të gjitha ekzaminimet imazherike e radiologjike të personave që kanë kërkuar ndihmë mjekësore pas përplasjeve.
Fokus kryesor i këtij veprimi procedurial është dokumentimi i plotë i lëndimeve fizike dhe përcaktimi i saktë i shkakut të tyre, me qëllim verifikimin e përdorimit të forcës gjatë shpërndarjes së turmës.
Të gjitha provat e sekuestruara do t'i nënshtrohen vlerësimit teknik nga ekspertët e Institutit të Mjekësisë Ligjore, të cilët do të përcaktojnë shkallën e dëmtimeve për secilin rast.
Paralelisht me sekuestrimin e kartelave, prokurorët do të marrin në pyetje personat e lënduar sapo gjendja e tyre shëndetësore ta lejojë, si dhe stafit mjekësor që ka dhënë ndihmën e parë, për të zbardhur dinamikën e plotë të ngjarjes dhe përgjegjësitë përkatëse ligjore.
