Kreu i Partisë Demokratike, Sali Berisha, ka dalë mbrëmjen e sotme nga selia e PD-së, duke e cilësuar ditën e pestë të protestave në Tiranë si një akt të mosbindjes civile.
Sipas Berishës, kryeqyteti nuk ka qenë kurrë më shumë se sot në duart e protestuesve. Ai deklaroi se mosbindja civile nuk është kufizuar vetëm në Tiranë, por është shtrirë edhe në qytete të tjera të Shqipërisë.
Kryetari i opozitës akuzoi kryeministrin Edi Rama se, në vend që të japë dorëheqjen përballë revoltës, kërkon viktima dhe gjakderdhje.
Berisha kërkoi dorëheqjen e menjëhershme të Ramës, duke i bërë thirrje t’i hapë rrugën një zgjidhjeje të re politike, të denjë për një vend anëtar të NATO-s.
Ai u bëri thirrje qytetarëve të solidarizohen me revoltën, të cilën e cilësoi si rrugën e drejtë të historisë dhe të demokracisë. Njëkohësisht, u kërkoi demokratëve të mobilizohen për mosbindje civile në çdo qytet të Shqipërisë.
Deklaratat e kreut të PD-së vijnë në një moment kur Tirana po përjeton ditën e pestë të protestave, të shoqëruara me përplasje të dhunshme mes protestuesve dhe policisë, të plagosur dhe dëme të konsiderueshme në kryeqytet.
