Situata në Bulevardin “Dëshmorët e Kombit” në Tiranë është tensionuar më tej, ndërsa përplasjet mes protestuesve dhe forcave të policisë vijojnë.
Nga mesi i turmës është hedhur një molotov në drejtim të një autoblinde të policisë që po përdorte ujë me presion për shpërndarjen e protestuesve. Mjeti është përfshirë nga flakët, të cilat janë shuar menjëherë falë ndërhyrjes së një tjetër autoboti me ujë që ndodhej pranë tij.
Menjëherë pas këtij incidenti, protestuesit kanë futur një automjet në mes të bulevardit dhe i kanë vënë flakën.
Përplasjet kanë vijuar me hedhjen e fishekzjarrëve në drejtim të efektivëve të policisë, duke e tensionuar më tej situatën në një nga zonat kryesore të protestës në kryeqytet.
